വാനരൻ

# മീറ്റർ

ഇഞ്ചോട് ഇഞ്ചു

അടി, മീറ്റർ

സെന്റിമീറ്റർ.

നീണ്ട ചേട്ടൻ വരകൾ

കൃത്യം അകലം പാലിച്ചു

കുഞ്ഞനിയൻ വരകൾ.

ഉരുട്ടിക്കയറ്റിയ റെയിൽ പാളം.

മേസ്ത്രി ചുവയിൽ

എല്ലാം കിറു കൃത്യം .

# കണ്ണ്

ഒരു മീറ്ററാണ്.

നോട്ടങ്ങൾ ഇഴഞ്ഞുവരുന്നത്

അളന്നുനോക്കി തിരികെപ്പോകാനാണെന്നു

ഒരിക്കൽ , ഞാനറിഞ്ഞു .

എനിയ്ക് താടിയുണ്ട് -

കണ്ണിൻറെ അടിത്തട്ട് വരെ

കയറികിടക്കുന്നു.

പണ്ട് കാട്ടിലായിരുന്നു

മുതുമുത്തച്ഛൻമാർ .

മുടിചീകി നേരം കളയാറില്ല-

കൊഴിഞ്ഞുവീണവ

എണ്ണാറില്ല.

അങ്ങനെ -ഇങ്ങനെ

കേറിയിറങ്ങി പല്ലുകൾ .

# ഇടവേള

തുടക്കവും ഒടുക്കവും

അടയാളപ്പെടുത്തിയ

ഒരിടവേളയിൽ,

പണിക്കിടയിൽ

ചൂട് ചായ ഊതിക്കൊണ്ടിരുന്നപ്പോൾ

അവിചാരിതമായി

മുന്നിലുള്ളവർ എണ്ണീറ്റുപോയി!

പിറകെ ,

നങ്കുരമിട്ട കൊളുത്തുകൾ

ഒച്ചവെച്ചു കൺപോളകളിൽ

തിരിച്ചിടിച്ചതും കണ്ടു.

മഴയത്തു മൺകൂന

കുതിർന്ന് താണു .

ആ സമയത്തു

മുഖം ഉടുപ്പിനുള്ളിലേക്ക്

ഊർന്ന് വീണു.

ഒരു തരത്തിൽ ,

തേട്ടി വന്ന കണ്ണീരും തെറിയും

മറച്ചുപിടിച്ചതാകാം .

അളന്നു നോക്കി,

തൂക്കി വിൽക്കാൻ ഒരു ജീവിതം!

ഞായറാഴ്ച്ചചന്തയിൽ,

ആൾത്തിരക്കിൽ ,

പച്ചമാംസങ്ങളുടെ ചോരമണത്തിൽ

എവിടെയോ ഒരു കൊളുത്ത്

എനിക്കുവേണ്ടി ഒരുങ്ങുന്നു.

തോന്നലാണോ ?

# മഞ്ഞ

ഒന്ന്, രണ്ട് , എലികൾ

തിരക്കിട്ടോടും വഴി

എന്നെ മാത്രം തിരിഞ്ഞുനോക്കി.

കൂട്ടത്തിൽ ഒരുവനെപ്പോലെ!

(ഇനി കാണുന്നതെലാം

മഞ്ഞയാകുമോ ?)

അവർക്കു പിറകെ ,

ഇരുട്ട് പറ്റിയ,പൊളിഞ്ഞ ഇടങ്ങളിൽ

മണ്ണിലേക്ക്

താഴുന്ന തുരങ്കം നോക്കി

ഞാൻ ഇഴഞ്ഞു-കാൽപ്പാടുകൾ

വീഴ്ത്താതെ.

അടിത്തട്ടിൽ ,

കാരണവന്മാർ ഉറങ്ങിക്കിടക്കുന്ന

മണ്ണിൽ ,കമഴ്ന്നുകിടന്നു.

വേച്ചു വേച്ചു വന്ന

മൂത്തുനരച്ച ഒരില

കണ്ണുനീർ തേവിയെടുത്തു.

- സി. എസ്.